Canta U Populu Corsu
Corsica Nazione
O fratelli patriotti
Di spiritu naziunale
Chi vulete esse sciolti
Da e putenze culuniale
Oghje le prigiòne francese
Crescenu le vostr'offese.
Si stringhje lu nostru core
Di sapevvi incarcerati
Spartimu listess'amore
È ci sentimu inghjuliati
Site lu sangue è la forza
Di a nostra terra corsa.
Vi sarà longa la strada
Duri saranu i passi
E da lu pianu a la sarra
Indu l'andati è i chjassi
Truverete e vistighe
Di tante battaglie antiche.
A Francia vi dà l'agrottu
In fondu à le so furturezze
Ma u soffiu patriottu
In ogni pieve si tesse
È risorge la passione
Di la Corsica Nazione.
(Paghjella)
From Letras Mania